Ginpanginbulahan sang alkalde sa ciudad sang Bacolod ang mga atleta nga nakakuha na sang medalya sa nagapadayon nga Negros Island Region Athletic Association Meet 2026 .
Sa latest nga medal tally as of 5:30 PM kahapon, Marso 4, ang Bacolod City nga may yara sang 81 ka gold, 43 ka silver, kag 31 ka Bronze; Negros Occidental nga may 41 gold, 70 silver kag 42 bronze samtang ang nagapangatlo ang Bayawan City nga may 15 gold, 12 silver kag siyam ka bronze.
Sa interview sang Bombo Radyo Bacolod kay Bacolod City Mayor Greg Gasataya, madamo pa sang nabilin nga mga sports events apang ginapanginbulahan sini ang mga nakakuha na sang medalya.
Samtang may yara man ini sang panugyan sa mga atleta nga wala nakatigayon nga makakuha sang medalya nga indi mag-untat kag magpadayon lamang sa pagtraining kag tinguhaan sa masunod nga regional meet nga sila naman ang makakuha sang medalya ilabi na ang gold medal.
Suno kay Gasataya ang ciudad sang Bacolod ang padayon man nga magasuporta sa mga atleta sang ciudad bangud nagapati ang alkalde nga may yara ini sang dako nga epekto sa mga kabataan.
Suno pa diri, nagapasalamat man ang ciudad sa DepEd Bacolod nga nagfacilitate sa hinampang.
Dugang pa sini nga madamo ini sang nabaton nga mensahe nga ang pag-host sang regional meet ang dako ang nabulig sa mga kalan-an, restaurants kag sa mga tiyangge sa palibot sang billeting areas.
Suno kay Gasataya ini man ang rason nga sa una palang nga adlaw sang regional meet ginaduso na sang ciudad ang sports tourism.
Suno diri ang nasambit nga pahampang magluwas nga maayo ang epekto sa sports nga prayoridad gid apang may epekto man ini sa turismo kag ekonomiya sang ciudad.
Padayon man ang pagpangamuyo sang alkalde sa kadalag-an sang mga atleta.
