Handa na ang mga atleta sang Negros Occidental nga magasabak sa Western Visayas Regional Athletic Association Meet nga hiwaton sa probinsya sang Aklan halin Abril 26 tubtub Abril 30.
Ang hinampang ang magabukas sa Calangcang Sports Complex sa Makato, Aklan alas-4:00 bwas sa hapon.
Ang iban nga DepEd officials ang nagpadulong na sa Aklan tatlo na ka adlaw ang nakaligad agud malantaw ang sitwasyon didto.
Bangud sa tuman nga kainit sang panahon, ginsaylo ang pagsugod sang parada kag opening program nagikan sa alas-3:00 sa hapon padulong sa alas-4:00 sa hapon, apang magadepende pa gid ini sa kainit sang panahon bwas.
Ang delegasyon sang Negros Occidental ang naka-billet sa karon sa Bacan Elementary School kag Bacan National High School.
Sa interview sang Bombo Radyo kay Negros Occidental Provincial Sports Coordinator Romeo Sison, may pila ka mga atleta nga natipalo samtang nagatraining apang handa na sila nga magsabak sa hinampang.
Kumpirmado naman ang attendance ni Governor Eugenio Jose ‘Bong’ Lacson sa opening ceremony sang WVRAA Meet 2023.
Sa kabug-usan, masobra 500 ang mga atleta kag players sang Negros Occidental kag naghingyo ini sa mga coaches nga siguruhon nga husto na ang preparasyon sang mga ini sa pagsabak sa hinampang.
Naghatag sang good luck wishes si Lacson sa mga atleta sang Negros Occidental kag nagalaom ini nga madamo nga medalya ang makuha sang probinsya sa regional meet nga magasabak naman sa Palarong Pambansa.
Sa karon, wala pa natumod kun pila ang cash incentives nga ihatag sang provincial government sa mga makakuha sang medalya sa regional meet.
