Nagdangat na sa masobra 70 ka mga baboy ang hungod nga ginpatay kag napatay bangud sa balatian sa Barangay Tangub, ciudad sang Bacolod.
Sa interview sang Bombo Radyo kay Punong Barangay Noli Villarosa, nagdamo na gid ang mga hog raisers nga napatyan sang baboy kag nagapangayo sang financial assistance.
Santo sa latest data sang African Swine Fever Task Force sang Tangub, 40 ang nagkalamatay bangud sa balatian samtang 35 naman ang ginpaidalom sa culling.
Suno diri, mahimo nga ang Barangay Tangub ang may pinakamadamo nga numero sang mga baboy nga nagkalamatay sa bilog nga ciudad sang Bacolod.
Ginaistoryahan naman sang Barangay Council kun pila ang financial assistance nga mahatag sa hog raisers bangud ang iban diri ang nagkalamatay lang kag indi hungod nga ginpaidalom sa culling bangud sa African Swine Fever.
Suno diri, ang hog raiser nga nagasagod sang mga baboy nga ginpaidalom sa culling ang makabaton sang mas dako nga bulig pinansyal bangud mapagsik man ang mga ini gani gina-evaluate ini sang Barangay Council kaupod ang City Veterinary Office.
Suno kay Villarosa, may mga nayon nga napatyan sang idik gani ginpaidalom nalang sa culling ang dalagko nga baboy paagi sa pagkuryente kag sila ang ginlubong.
Suno diri, P2,000 tubtub P3,000 ang ibayad sa kada baboy nga napatay bangud sa balatian samtang mas mataas diri ang mabaton sang nagasagod sang ginpaidalom sa culling.
