Nagpanawagan ang pinuno sang Department of Public Services sa ciudad sang Bacolod sa mga pumuluyo nga mangin responsable sa paghaboy sang basura.
Sa interview sang Bombo Radyo Bacolod kay Ma. Fe Tresfuentes, indi man maperpekto ang pagpangkolekta sang basura sang DPS bangud sa naglabay nga holiday season.
Suno kay Tresfuentes, pila sa mga garbage collectors ang nagpauli man sa ila tagsa ka pamilya apang may yara gihapon sang nakolekta sang basura.
Suno diri, wala man nag-untat sa pagpangkolekta sang basura bisan pa sang holiday apang nagdako ang volume sang basura.
Ginpahayag man sini nga sang Enero 2, nag-umpisa na sila sa pagdihon sang ila mga backlogs.
Nakita nga nagdamo ang volume sang basura kag segi-segi ang paghaboy sang basura sa sanitary landfill sang ciudad.
May mga indi lamang sila makolekta bangud sa mga soludlon nga mga lugar apang ginatinguhaan sang DPS nga ini ang makolekta.
Suno kay Tresfuentes, dapat mangin responsable man ang mga pumuluyo sa pagtipon kag paghaboy sang ila mga basura.
Suno diri sabaylo nga kuhaan sang litrato kag ipost sa social media, kuntani magbulig na lamang ang mga ini sa pagtipon kag paghaboy sang basura sang husto nga lugar.
Samtang, nagpasalamat man ini sa Bombo Radyo Bacolod sa pagkilala sang efforts sang mga street cleaners sang ciudad nga aga pa katama nagapanilhig agud nga mapabilin ang kalimpyo sang ciudad.
