Nagpanugyan ang Deputy for Medical sa Emergency Operation Center (EOC) sang syudad sang Bacolod nga magpadulong lang ang mga Bacolodnon sa bisan diin nga vaccination site kadungan sa tatlo ka adlaw nga National Vaccination Days nga maga-umpisa subong nga adlaw Nobyembre 29 tubtob Desyembre 1.
Suno kay Dr. Chris Sorongon, ang tatlo ka adlaw nga National Vaccination Days ang ginatawag “Bayanihan Bakunahan” ang ginlunsyar sang National Government kag dulungan nga patigayunon sa bilog nga Pilipinas.
Paathag sini nga ang himuon nalang sang mga pumuluyo amo ang magpadulong sa mga barangay vaccination centers, mga mega vaccination centers sa lainlain nga malls sa Bacolod City kag ini ang pagadugangan pa.
Suno kay Sorongon, pagabuksan man ang gymnasium sang Bacolod Tay Tung Highscool, St. John’s Institute-Hua Ming, Bacolod City National Highscool kag gym sa Barangay Estefania.
Magapabilin man nga bukas ang 24/7 vaccination sites nga Jollibee-East kag McDonalds-Lacson kasubong man ang North kag South Terminals nga may naka-assign man nga vaccination teams.
Paathag sang doktor nga dapat magdala sang bisan ano nga government issued ID kag ballpen agud nga mabakunahan ang mga edad 18 anyos pasaka.
Samtang ang 12 tubtob 17 anyos ang kinahanglan nga magdala sang birth certificate kag may kaupod nga guardian ukon ginikanan.
Pasalig naman ni Sorongon nga bisan wala sang government issued ID, bisan ano nga identification card nga makapakita sang kompleto nga pangalan sang magapabakun ang batunon man nila, kaangay sang Barangay ID kag Company ID.
Ini agud nga indi na mabudlayan pa ang mga Bacolodnon nga luyag magpabakuna.
