Dako ang pagpasalamat sang mga residente sa ciudad sang Bacolod nga nakabaton sang duha ka kilo nga bugas nagikan sa ciudad kasunod sang pagdeklarar nga ipaidalom ang ciudad sa state of calamity bangud sa epekto sang Bagyong Goring.
Sa interview sang Bombo Radyo Bacolod kay Crist Salazar, residente sang Purok Kabugwason, Barangay Mansilingan, Bacolod City, dako ang pasalamat sang mga ini sa nabaton nga bugas nagikan sa ciudad.
Suno kay Salazar, sa Manila nagapila ang tawo agud magbakal sang P45.00 kada kilo nga bugas samtang sa ciudad sang Bacolod nagapila agud makakuha sang libre.
Tatlo tanan sila sa ila nga balay nga nakakuha sang tagduha ka kilo nga bugas kun sa diin dako na nga bulig sa ila nga pamilya.
Samtang nagkuha lang ini sang authorization letter gikan sa kaingod nila balay agud masakop sa pagkuha sang bugas bangud nga indi na makalakat.
Ginpasalamatan sini ang ciudad sang Bacolod sa libre nga bugas kag nagpanawagan man sa iban nga residente nga magpila na agud nga makaavail sang libre nga bugas.
Samtang, masobra 14 mil ang makabaton sang libre nga duha ka kilo nga bugas para sa kabug-usan sang Barangay Mansilingan, Bacolod City.
Suno kay Bony Tupas, Coordinator, Bacolod City sa tagtaganay sang bugas sa AL Jayme Elementary School, nagdangat sa 14,816 ang beneficiaries para sa Barangay Mansilingan.
Suno kay Tupas, ginauna nila pasulod sa eskwelahan agud nga makapila sa pagkuha sang libre nga bugas ang mga senior citizens kag Persons With Disabilities.
Gin-athag man sini nga bisan indi registered voter basta may yara sang duha ka valid ID makabaton sang ginahatag nga bugas.
