Ginkumpirmar sang Mabinay Municipal Police Station sa Negros Oriental nga nagapabilin sa ila nga kustodiya ang tatlo ka mga naaresto nga Bacolodnon matapos nagpangawat sang cell site batteries sa nasambit nga banwa.
Ini sa pihak sang naggwa nga balita nga gilayon nga nakagwa ang mga suspetsado matapos makapyansa.
Madumduman nga nadakpan sanday Erwin Aribato, 30-anyos, Romelyn Quiatchon, 26-anyos, kag Joseph Villanueva, 30-anyos, residente sang nagkalainlain nga Purok sa Barangay Banago matapos nga ginbaligya ang mga kinawatan nga telco batteries sa isa ka junk shop sa Mabini Street, Barangay 25, Bacolod City, samtang nagapabilin nga at large ang isa pa nila nga kaupod.
Matapos madakop, gilayon naman nga ginturn-over ang mga kawatan sa Mabinay Municipal Police Station, nga amo ang magahandle sang kaso.
Sa interview sang Bombo Radyo Bacolod kay Police Major Vincent Paul Dumaguing, acting chief of police sang Mabinay Municipal Police Station, ginfile na nila ang kaso nga robbery batok sa apat, kalakip na ang isa nga wala pa madakpan.
Apang aminado si Dumaguing nga wala pa sini nakita ang kopya sang resolusyon gani wala pa ini nakahibalo kun may gintalana nga pyansa sa mga suspetsado.
Gin-athag naman sini nga indi pa mahimo marelease ang van nga gin-arkilahan sang mga suspetsado bangod ini ang magaserbe nga kabahin sang mga ebidensya kag igapresent sa korte kaupod sa mga ginkawat nga cell site batteries.
Nakadepende naman sa abogado sang tag-iya sang salakyan kun sila ang magafile sang motion agud makuha ang van.
