Nakaabot na sa Zamboanga sang mga badjao nga ginpapauli sang provincial government sang Negros Occidental sang Sabado sang aga.
Suno kay Provincial Incident Management Team commander Dr. Zeaphard Gerhart Caelian, alas-7:40 kahapon sang aga nakaabot sa Zamboanga ang mga badjao sakay St. Michael Archangel nga barko.
Ang aktibidad ang ginkilala nga “Mission: Badjao to Mindanao”, kun sa diin ginpasakay sila sa port sang Dumaguete.
Yara naman sa 94 ang mga Badjao nga nagikan sa Victorias samtang 38 naman ang gikan sa Sagay, apang wala nalakip sa pag-isip ang mga kabataan.
Dala man sang mga ini ang mga baslay kag makina sang mga sakayang pangdagat.
Nahibalaun nga pagpangisda ang nagapanguna nga palangabuhian sang mga Badjao sa Mindanao.
Ginpasiguro naman ni Caelian nga wala sang bisan isa nga Badjao nga magapabilin sa Negros Oriental kag mapabalik gid ang tanan sa Mindanao.
Pila sa mga ginpapauli ang nagikan sa nagkalain-lain nga lugar sa Mindanao kaangay sang Basilan, Zamboanga kag Jolo Sulu.
Ginseguro man sang Office of the Civil Defense (OCD) Region 6 nga pagabatunon ang mga Badjao sa Zamboanga kag may dala nga travel authority kag iban pa nga mga dokumento kadungan sang pagpaidalum sa RT-PCR test.
Naghatag man sang bulig pinansyal ang tagsa ka Local Government Units (LGU) kag ang Probinsya sa mga nagpauli nga Badjao.
Suno kay Caelian, gina-ekspektar naman nila nga may magapadulong naman sa probinsya sang Negros Occidental sa tion nga madula na ang COVID-29.
Ginpasalamatan man ni Caelian ang mga nagbulig agud nga madayon ang convoy, sa nagpakaon sa mga Badjao, kasubong man sa Negros Oriental nga nagpasugot nga mabyahe ang mga ini apisar sa border checkpoints.
Ginpasalamatan man sini si Provincial Administrator Rayfrando Diaz nga amo ang pinuno sang Badjao Mission kasubong man ang Office of the Civil Defense (OCD) sa pagpanguna ni Regional Director Jose Roberto Nuñez nga nagplastar sang ila pagbyahe padulong sa Zamboanga.
