Gin-athag sang Department of Social Services and Development (DSSD) sa ciudad sang Bacolod nga nagikan sa Victorias City ang mga badjao nga makita sa pila ka mga fastfood chain sa ciudad matapos nga nagpauli na sa Sulu ang 73 ka mga badjao sadtong Oktubre 5.
Sa interview sang Bombo Radyo Bacolod kay DSSD head Pacita Tero, ginpahayag sini nga may grupo sang mga badjao nga nagikan sa ciudad sang Victorias nga nagapadulong sa Bacolod agud mangayo-kayo apang nagapauli man ang mga ini dayon pagka-hapon.
Suno kay Tero, ginatinguhaan man sang provincial government nga ma-facilitate ang mga ini agud makapauli man sa Mindanao.
Dugang pa sini nga nagapakig-angot sa iya ang counterpart sa probinsya agud magpangayo sang bulig kun paano ang proseso sa pagpauli sa mga badjao sa Sulu.
Sa karon suno kay Tero nagahulat nalang ang probinsya sang approval sang Office of the Civil Defense sang Bangsamoro Autonomous Region in Muslim Mindanao agud matigayon na nga mapapauli ang 95 ka mga badjao nga yara karon sa Victorias City.
