Ginkompirmar sang pinuno sang Department of Social Services and Development (DSSD) sang Bacolod nga may yara sang ginadihon nga programa ang syudad agud makapauli na sa Mindanao ang mga Badjao.
Sa interview sang Bombo Radyo Bacolod kay Pacita Tero, may mando ang alkalde nga maghimo sang tikang agud matipon ang mga nagaliho-liho nga mga Badjao sa syudad bangud ginalantaw nga posible nga carrier sila sang coronavirus.
Gintipon ang 75 ka mga Badjao kag gindala sa safe house sang DSSD.
Suno kay Tero, ginagastuhan man ang mga ini sang syudad agud indi na sila maggwa kag ginpabantayan naman agud indi makagwa.
Nagapasalamat man si Tero nga nagpasugot ang mga Badjao nga ibutang sa isa ka lugar apang aminado ini nga sa una, nagapangduha-duha pa sila apang sa ulihi, nakimbinsi man.
Ginpahayag man ni Tero nga ginacoordinate na ni Mayor Evelio “Bing” Leonardia sa Office of the Civil Defense (OCD) Region 6 kag ginacoordinate man sang ahensya sa OCD sa Bangsamoro Region agud mahitso ang ila pagpauli.
Ginatinguhaan naman nga icoordinate sa Office of the Presidential Secretary for Visayas ang angot sa pagpauli sa mga Badjao sa Mindanao agud mahatagan sila sang libre nga bus nga masakyan papauli.
Suno kay Tero, maagi ang mga ini sa Dumaguete sa tion nga may yara na sila sang acceptance nagikan sa Julu, Solo.
Nakuhaan naman sang DSSD ang mga ini sang medical clearance kag Travel Authority.
Ginalantaw naman ni Tero nga kun may yara sang ihatag nga pangabuhian ang Local Government Units (LGU) sa mga Badjao, indi na sila magbalik pa sa pagtabok sa isla sang Negros ukon sa syudad sang Bacolod kaangay lamang sang mga ati sa Boracay sa Aklan.
