Nagdangat sa 75 ka mga balay ang nahalitan sang buhawi nga naglabay sa ciudad sang Bago, Negros Occidental sang Huwebes sang hapon.
Sa interview sang Bombo Radyo Bacolod kay Dr. Merijene Ortizo, pinuno sang Bago City Disaster Risk Reduction Management Office (DRRMO), nakapatigayon na ang opisina sini sang rapid damage assessment and needs analysis sa apektado nga mga kabarangayan, natigayon man ang clearing operations nga ginpangunahan sang City Engineer’s Office samtang ang DRRMO emergency medical services ang naghatag man sang first aid assistance sa tatlo ka mga nasamaran nga tuga sang buhawi.
Naghatag man sang relief ukon food packs ang City Social Welfare and Development Office (CSWDO) sa mga apektado nga pamilya samtang naghatag man sang hygiene kit ang City Health Office (CHO).
Ginbaton naman sang DRRMO ang mga dokyumento sang mga totally damaged nga balay agud hatagan sang P10 mil nga cash assistance samtang P5000 naman sa partially damaged apang sa karun igavalidate pa ang mga dokyumento agud matumod ang mga beneficiaries.
Ginpahayag man sini nga ang labi nga naapektuhan nga mga pamalay ang yara sa apat ka mga purok sa Barangay Malingin, Bago City nga nagadangat sa 55, ginsundan sang Brgy. Atipuluan nga may 12 ka mga panimalay, Barangay Alyansa nga may anom, kag Don Jorge Araneta sa Central Ma-ao nga may duha ka balay nga apektado.
Madumduman nga may yara man sang nagluntad nga buhawi sa ciudad sang Martes nga nag-igo sa Barangay Atipuluan, Barangay Abuanan kag Barangay Ma-ao.
Suno kay Ortizo, naproseso naman ang mga papeles sang mga naapektuhan sang buhawi sang tinalikdan nga Martes agud mahatagan sang financial assistance.
Samtang, ginpahayag man ni Ortizo nga bangud sa dagway sang panganod naantisipar na sang mga ini nga may yara sang maluntad nga buhawi.
Suno pa diri, naeksperyensyahan naman sang ciudad ang buhawi duha na katuig ang nakaligad gani nagpanawagan ini sa publiko ilabi na sa mga pumuluyo sang apektado nga lugar nga ipabilin ang pag-aligmat kag updan sang hugot nga pagpangamuyo nga mapahilayo sa mga kalamidad.
