Ginkompirmar sang pinuno sang Bago City Disaster Risk Reduction and Management Office nga indi magnubo sa 15 ka mga panimalay ang totally damaged kadungan sang buhawi nga naglabay sa Brgy. Atipuluan kag Brgy. Abuanan, ciudad sang Bago Martes sang hapon.
Sa interview sang Bombo Radyo kay Dr. Merijene Ortizo, ginpahayag sini nga base sa mga ginpasa nga damage assessment sang mga barangay, 13 ka mga panimalay ang naguba sa Purok Rose, Cadena de Amor kag Brgy. Abuanan, Bago City samtang tag-isa naman ka panimalaya sa Brgy. Atipuluan kag Brgy. Ma-ao.
Suno kay Ortizo, ginavalidate pa nila ang report kun may yara sang naapektuhan sang Brgy. Dulao kag Brgy. Busay.
Suno sa iya, ang tagsa ka mga barangay ang naga-ubra sang damage assesment report nga pagabasehan sang ciudad sa bulig pinansyal nga ihatag sang mga apektado nga pumuluyo.
Suno sa iya, kun totally damaged ang balay, makabaton sila sang P10,000 samtang kun partially damaged naman, makabaton sang P5,000.
Gindugang man sini nga amat-amat na nga nagapamanday ang pila ka mga residente agud makay-o ang ila puluy-an.
Ginalauman man sini nga subong nga adlaw may yara pa sang may madugang nga reports nagikan sa iban nga mga barangay.
