Nakaplastar na sang ila mga ginabaligya nga mga bulak ang mga flower vendors sa Rizal St. Barangay 12, Bacolod City pila ka adlaw antes ang tigkalalag ukon UNDAS.
Nanari-sari nga mga bulak ang ginpangplastar sang mga vendors.
Ang presyo sini ang nakadepende sa klase sang bulak nga imo pagabaklon.
May yara man sang pilian nga klase sang flower arrangements ang mga pumuluyo nga magabakal sang bulak agud ihalad sa ila mga nagtaliwan nga mga himata sa tigkalalag.
Suno sa Arnel, nagatrabaho sa flower shop, madamo na nga ila suki ang nagpadulong sa ila baligyaan agud nga magbakal sang bulak.
Suno diri ang ila nga ginabaligya nga bulak ang ginakuha pa nila sa Benguet, Dangwa, kag Cebu.
Nagakuha man sila sang supply sa Mambukal apang ordinaryo lamang ini.
Ginaputos man nila sa plastic ang bulak sang mga customer agud nga indi dayon malaya.
Suno diri, ang mga customer ang mahimo man nga makadugang sang bulak sa mga naarrange na kun luyag sang mga ini.
Ang pinakanubo nga mabakal nga bulak ang yara sa P150 samtang ang pinakamahal ang nagdangat sa P1500.
Subong nga adlaw ginalauman nga magdagsa ang nagabakal sang bulak tubtob nga matapos ang tigkalalag.
Samtang ang mga empleyado sang gobyerno ilabi na sa City Government kag Provincial Government ang half-day agud nga mahatagan ang mga ini sang tinion agud nga makabiyahe kag makabisita sa ila mga minatay sa tigkalalag.
