Nagpadulong sa Bacolod City Government Center ang pila ka mga Barangay Health Workers (BHW) agud makighinun-anon kay Bacolod City Mayor Alfredo “Albee” Benitez natuhoy sa pila ka concerns, partikular na ang ginpromisa nga COVID risk allowance.
Suno kay Councilor Kalaw Puentevella, ang chairperson sang Committee on Health sa Sangguniang Panlungsod, ang COVID allowance ang ginpromisa sang nakaligad pa nga administrasyon.
Suno diri, sang 2020, ang mga BHW nga nagserbe bilang frontliners kaangay sa mga nagpatigayon sang survey, contact tracing, pagbantay sa mga COVID facilities, pagbantay sa mga naka-home quarantine kag pagbalikbalik sa mga COVID positive sa paghatag sang medical treatment.
Sila ang gintanyagan nga pagahatagan sang P9,000 kada bulan, apang pila na ka tuig ang nakaligad, ini ang wala gihapon nabatun sang mga BHW.
Suno kay Puentevella, ang City Ordinance ang gin-author ni former Councilor Cindy Roxas kag ginpasar sa Sangguniang Panlungsod, gani ginakatingala sini kun ngaa wala sang may nahatag nga alokasyon.
Panindugan sang konsehal nga wala sang pondo nga na-alokar ang Benitez Administration para sa nasambitan nga programa para sa karun nga tuig 2023.
Ang ginalantaw na lamang nila nga mahimo solusyon sa problema sang mga BHW amo ang magpangita sang makuhaan nga budget, ilabi na nga ginakilala man sang mga ini ang sakripisyo sang mga BHW sa kasagsagan sang COVID-19 pandemic.
Magluwas sa ginapaabot nga risk allowance, nagahingyo man ang mga ini sang disente nga opisina kasubong man pagsaka sa sweldo.
Aminado naman si Puentevella nga wala pa ini nakahibalo sang kaundan sa nangin paghinun-anon sang mga BHW sa alkalde bangod ini ang wala nakatambong ilabi na nga siya ang nakaleave sang sila ang magsapol.
Apang kun igakonsiderar ni Benitez ang request, ini ang magakinahanglan pa sang pagtuon, agud mahatag ang benepisyo nga nagakadapat para sa mga health workers.
