Duha ka mga tawo ang napatay samtang tatlo ang pilason matapos makuryente samtang nagakakas sang Christmas Tree sa Barangay Poblacion, Mabinay, Negros Oriental, kahapon, Enero 6.
Ang mga napatay ang ginkilala kanday Barangay Arebasore Kagawad Elnie Endencio kag Juniel Tenebroso, 31 anyos, isa ka lift operator.
Samtang ang mga nasamaran ang ginkilala kanday Jay-ar Norbe, 33 anyos isa man ka Barangay Kagawad sang Arebasore; Realyn Billares, 19 anyos, SK Chairwoman sang Barangay Banban; kag Kimjun Padasay, 30, Barangay Secretary sang Barangay Arebasore, Mabinay.
Sa interview sang Bombo Radyo Bacolod kay Negros Oriental Police Provincial Office Spokesperson Police Lt. Stephen Polinar, ang grupo ang ginpakakas sang Christmas tree kag sang christmas lights gamit ang lift truck.
Suno kay Polinar nasagaid ang main line nga may live wire nga nagtuga sang pagkuryente.
Suno diri ang Christmas tree kag lights ang gingamit sa holiday season kag gingamit man sa Lingganay Festival.
Sa karun ang mga nasamaran ang padayon nga ginabulong sa ospital sa banwa sang Mabinay.
