Ginapapreparar na ang mga Barangay sa Bacolod City inkaso magpatuman sang preemptive evacuation bangod sa Tropical Storm BASYANG.
Sa interview sang Bombo Radyo Bacolod kay Dr Ma. Laarni Pornan, head sang Bacolod City Disaster Risk Reduction and Management Office, nagpatigayon na sila kahapon sang pre-disaster assessment upod ang mga Punong Barangay sang 61 ka Barangay sa Bacolod City.
Dugang pa ni Pornan nga sang gindeklarar ang Storm Signal No 1 sa Negros Island Region, gilayon man nga ginpaidalom sa red alert status ang Bacolod CDRRMO.
Suno diri, sang magbaha sang Sabado bangod sa Shear Line, sila ang nagpatigayon na sang flood mapping agud matumod ang epekto sang pagbaha.
Suno diri, may mga Barangay nga naglapad ang coverage sang pagbaha kaangay sa Brgy 1, 2, 5 kag 9 kun sa diin mas madamo ang purok nga ginbaha.
Nakita nila nga kalabanan sa baha ang bangod sa mga damaged nga flood walls ukon riprap.
Suno diri, padayun ang ila nga monitoring kag ang impormasyon ang ginapalab-ot man kay Bacolod City Mayor Greg Gasataya.
Pahanumdom na lamang ni Pornan sa mga pumuluyo nga maga-evacuate nga dal-on ang mga importante nga dokumento agud indi malab-ot sang baha kasubong man paluson ang mga nakasaksak nga kuryente antes biyaan ang balay.
Dugang pa sini nga isecure man ang mga kabataan, senior citizen kag mga persons with disability, kag mas maayo nga magbalon sang extra nga bayo kag pagkaon.
Pasalig man sini nga tinguhaan sang ciudad nga makahatag gilayon sang bulig partikular na sa pagkaon para sa mga evacuees.
