Ginalantaw nga indi na paghatagan sang syudad sang Bacolod sang subsidy ang mga barangays nga nagpasakop sa Electric Masskara kag Masskara Street Dance and Arena Competition nga wala nagpasa sang ila nga liquidation sang subsidy nga nabaton nagikan sa syudad sang Masskara Festival 2022.
Sa interview sang Bombo Radyo Bacolod kay Councilor Jason Villarosa, Chairman sang Committee on Tourism sa Sangguniang Panlungsod, ginhatagan sang syudad ang 23 ka mga barangay sa syudad nga nagpasakop sa Electric Masskara kag Masskara Street Dance and Arena Competition 2022 sang deadline agud nga magpasa sang liquidation.
Sa 23 ka mga barangay, ang Barangay 34 lamang ang nakahingagaw pa sa sang liquidation report sa accounting department sang syudad apang ang iban tubtob sa karun ang wala pa nakapasa.
Nahibaluan nga nagpasakop sa Electric MassKara amo ang Barangays 7, 12, 14, 22, 26, 27, 31, 34, 35, 40, Singcang-Airport, Alijis, Granada, Alangilan, Estefania, Sum-ag, kah Tangub kag sa Masskara Street Dance and Arena Competition nga ginpasakupan sang Barangays 1, 3, 4, 5, 6, 16, 17, 20, 23, 25, 29, 32, kag 39.
Suno kay Villarosa, ang ciudad ang naghatag sang P150,000 subsidy para sa nagpartisipar sa Electric Masskara samtang P200,000 subsidy sa nagpartisipar sa Street Dance and Arena Competition sang Masskara Festival 2022.
Suno kay Villarosa, ang mga barangay nga wala nakapasa sang liquidation report nga nagpasakop sa competition ang mahimo sagihapon nga magpasakop apang wala na sang subsidy nga mabaton nagikan sa syudad.
