BACOLOD CITY — Subong pa lang, excited na ang mga benepisyaryo nga makabaton sang libre nga pustiso kadungan sang Bombo Medico 2018 sa bulan sang Hulyo.
Kaina sang aga, ginpatigayon na ang impression taking ukon pagtakos sang pustiso sa Bacolod Multi-Specialty Center kun sa diin nahamtang ang clinic sang Mendez Dental Group.
Suno kay Dr. Ana Rose Trocio, presidente sang Philippine Dental Association Bacolod City nga isa sa mga partners sang Bombo Radyo, 28 nagikan sa 30 nga nalakip sa una nga batch ang nakatigayon nga makapatakos sang pustiso sa clinic.
Ang impression taking ang una nga tikang sa pagtakod sang pustiso.
Bangud nataksan na suno kay Trocio, sigurado na nga makabaton sila sang dentures sa maabot nga bulan sang Hulyo.
Isa sa mga nagpatakos amo si Nanay Erlinda Rivera nga halin pa sa Barangay Caliling, Cauayan, Negros Occidental.
Suno diri, alas 4:30 sang kaagahon siya naghalin sa ila balay agud nga makapadulong sa ciudad sang Bacolod.
Excited na gid ini nga makaangkon sang pustiso bangud ginahikayan siya sang ila mga kasimaryo nga wala siya sang ngipon.
Kaangay ni Rivera, lubos man ang pagpasalamat ni Nelson Martisano sang Barangay Mambulac, Silay City nga madali nalang siya makabaton sang pustiso kag wala pa sang bayaran.
Suno diri, pila na ka tuig nga wala siya sang pustiso bangud gintaban sang ilaga matapos matumba ang baso nga iya ginahuluman sang dentures.
Nagpanugyan man ini sa mga Bacolodnon kag Negrosanon nga magpamati sa Bombo Radyo agud indi maulihi kun may yara sang kaayuhan.
