Bisan pabor sa plano nga tingubon nalang ang paghatag sang conditional cash assistance sa mga benepisyaryo sang Pantawid Pamilyang Pilipino Program, aminado ang isa ka benepisyaryo sa Negros Occidental nga kinahanglan indi magsalig sa ayuda sang gobyerno.
Tinalikdan nga adlaw, ginpahayag ni incoming Secretary Erwin Tulfo nga nagaplano ini nga himuon nga isa nalang ka bagsakan ang paghatag sang ayuda sa 4PS sa baylo nga ihatag ini kada bulan.
Suno kay Tulfo, sarang manegosyo ang P12,000 tubtub P14,000 kun tingubon hatag sa benepisyaryo sangsa maghatag sang P1,200 tubtub P1,400 kada bulan.
Mahimo man ini madugangan sang pang-livelihood agud mas dako ang kantidad kaangay sang P19,000 tubtub P20,000 kun sa diin makasarang na ang mga pamilya nga magtindog sa ila kaugalingon nga tiil.
Sa interview sang Bombo Radyo kay Emily Arda sang Barangay Cudcud, San Carlos kag nagabulante sang utanon sa Libertad Market, paborable man kun tingubon hatag ang ayuda bangud makatingob man sila bakal sang bugas samtang ang iban ang itigana nalang para sa emergency.
Apang aminado ini nga indi dapat magsalig sa ayuda nagikan sa gobyerno kundi mangita sang iban nga paagi agud may dugang nga income.
Suno kay Arda, piyan-piyan lang ang ginahatag sang gobyerno.
Si Arda ang may isa ka bata nga kwalipikado sa 4Ps bangud nag-untat ang iban.
SAMTANG…Mas pabor ang isa ka benepisyaryo sang Pantawid Pamilyang Pilipino Program sa ciudad sang San Carlos kun bulanan lang ang paghatag sang conditional financial assistance nga ginapaagi sang gobyerno sa Department of Social Welfare and Development.
Suno kay incoming Secretary Erwin Tulfo, tun-an pa sang mga eksperto kag social workers ang iya suggestion nga tingubon nalang ang paghatag sang ayuda kun sa diin posible nga suguran ini sa pili nga barangay antes ipatuman sa bilog nga pungsod apang kun indi magmadinalag-on, magabalik na sa 4Ps nga bulanan.
Tuyo kuntani ni Tulfo nga gamiton para sa livelihood ang nasambit nga ayuda gani mas makabulig kun lump sum ang pagrelease.
Sa interview sang Bombo Radyo kay Emelorie Dinglas sang Barangay Cudcud, San Carlos City kag nangin benepisyaryo sang 4Ps halin sang tuig 2009, mabudlay kun tingubon ang ayuda bangud mahimo nga maubos ini dayon.
Bangud sa private school nagaeskwela sang Senior High School ang bata ni Dinglas, mapilitan gid ang mga ini nga maggasto sang ila kaugalingon nga kwarta kun exam na kag wala pa ang ayuda nagikan sa DSWD.
Suno sa iloy, mas maayo ang subong nga set up nga bulanan ang paghatag sang ayuda bangud kun alang-alang ang bulante, may ibakal sila sang bugas.
Apang kun desisyon sang incoming secretary suno sa iya nga lump sum ang ihatag, respetuhon ini sang mga benepisyaryo.
