Arestado ang duha ka mga benepisyaryo sang Social Amelioration Program sang Department of Social Welfare and Development (DSWD) kag duha ka iban pa sa Purok Nami-Nami 1, Brgy. Sum-ag, Bacolod City matapos madakpan nga nagasugal kahapon.
Sa interview sang Bombo Radyo Bacolod kay Police Lt. Jonito Pastrana, station commander sang Police Station 9, ginpahayag sini nga ala-1:00 sang hapon kahapon nakabaton na sila sang impormasyon nga may yara sang nagaluntad nga illegal gambling sa nasambit nga lugar gani gilayon sila nga nagresponde.
Ang mga arestado ang ginkilala kanday Mansueto Albarico, 28 anyos, SAP Beneficiary; Dionisio Ramos Jr., 45 anyos, kag SAP Beneficiary; Marverous Minque, 23 anyos, babayi; kag Jessabel Ramos, 18 anyos kag lunsay mga residente sang Prk Nami-Nami 1, Brgy. Sum -ag, Bacolod City.
Narecover sa paghinakop sang mga ini ang isa ka set sang playing card kag bet money P78.
Nakahunong sa karun sa Bacolod City Police Station 9 ang mga arestado kag natalana nga pasakaan sang kaso.
