Dako ang ginnubo sa firecracker-related injuries sa Negros Island Region kun ikumparar sa pagtakop sang tuig 2024.
Sa interview sang Bombo Radyo Bacolod kay Department of Health – Negros Island Region Assistant Regional Director Adrian Hort Ramos, 69 cases lamang ang ila ulihi nga record kahapon Enero 1, nga dako ang pagnubo kun ipaanggid sa 135 cases sang magtakop ang 2024.
Ang mga narecord nga kaso ang ginabug-usan sang duha sa Bacolod City, 49 sa Negros Occidental, 17 sa Negros Oriental kag isa ka kaso sa Siquijor.
Kun sa una nga mga records boga ang nagapanguna nga nakatuga sang firecracker-related injuries, ini ang nalapawan na sang triangulo kahapon matapos ang pagsug-alaw sang Bag-ong Tuig.
17 ka kaso ang bangod sa triangulo, 11 ang tuga sang boga, walo sa pritis, lima sa 5-star, whistle bomb kag lata canyon, sparkler kag iban pa.
May isa ka kaso nga for amputation matapos malukpan sang candle bomb sa kamot ang 34 anyos nga babayi nga nakatughong sang makahulubog nga ilimnon.
Pahanumdom ni Ramos nga bisan ang mga gamay lamang nga samad nga tuga sang palupok ang dapat gilayon nga dal-on sa mga health facilities agud malimpyuhan sang maayo, maka-inject sang anti-tetanous kag mahatagan sang antibiotics.
Paathag sini nga indi na hulaton pa ang paggwa sang sintomas bangod pila pa ka semana antes makita ang mga sintomas sang tetanous.
Samtang pahanumdom man sini nga tapuson gid ang pag-inom sa resita nga antibiotics.
