Nagpasalig ang Bacolod City Fire Station nga sila ang magaseguro sang augmentation sang tubig sa mga billeting schools sang mga delegasyon sa Western Visayas Regional Athletics Association (WVRAA) Meet 2024 nga magarequest sa ahensya.
Sa interview sang Bombo Radyo Bacolod, kay Fire Officer 1 Paul Servano, tagpamaba sa Bacolod City Fire Station, ang Bureau of Fire Protection (BFP) – Negros Occidental ang magaplastar sang fire truck sa Panaad Park and Stadium para sa patigayunon nga opening ceremony para sa pahampang alas-5:30 subong nga hapon.
Hingyo naman sang Bacolod City Fire Station nga ang incident management team sang WVRAA committee na lamang ang magarequest sang augmentation.
Nagapati ini nga may-ara sang nagamonitor sa 12 ka billeting schools, gani sila ang nakahibalo kun ano nga eskwelahan ang dapat mauna sa paghatag sang tubig.
Sa karun suno kay Servano, isa-isa nga nagarequest ang tagsa ka eskwelahan gani mabudlay a ila ang water distribution.
Nahibaluan nga lima sa mga firetrucks sang BFP-Bacolod ang ginapaidalum pa sa repairs.
Dugang pa ni Servano nga ang ila water distribution ang ginapatugayon lamang alas-9:00 sa aga tubtob alas-4:00 sa hapon bangod ginapreparar man nila ang mga firetruck kag personnel sa nabilin nga oras.
Paathag sini nga pagdangat sang alas-4:00 sang hapon masami naga-umpisa ang mga sunog partikular na ang mga grassfires.
Apang pasalig sang mga ini nga ang BFP-Bacolod ang nakahanda nga magfacilitate sa tion nga may mabatun nga request sa water rationing.
Suno diri, derektiba ni Bacolod City Mayor Alfredo “Albee” Benitez nga macater ang panginahanglanon sa tubig sang mga delegasyon gikan sa iban nga probinsya.
