Hugot ang pagbantay sa dulunan sang Bago kag Bacolod agud nga indi makasulod sa Bago ang mga baboy nga nagikan sa Bacolod nga nakarecord na sang kaso sang African Swine Fever.
Ginacheck man ang mga baboy nga nagagwa sa Bago agud masiguro nga ang nagatransport sini ang may certificate nagikan sa barangay nga pamatuod nga wala ini nagabalatian.
Sa interview sang Bombo Radyo kay Ma. Corazon Jereza Ladon, paravet sa Barangay Poblacion kag nagabantay sa border nga nahamtang sa Barangay Lag-asan, Bago City, 24/7 ang ila pagbantay sa mga nagagwa kag nagasulod nga pork kag pork products.
Suno kay Ladon, ila ginalantaw ang sitwasyon sang baboy apang ang nagatsekyar gid sini amu ang technician sa slaughterhouse.
Suno sa iya, antes makalabay sa border, dapat may ipakita nga barangay certificate kag veterinary health certification nga gin-issue sang City Veterinary Office.
Nagpagwa naman sang executive order ang alkalde sang Murcia nga nagadumili sa mga live pork kag pork products sa pagsulod sa banwa kun wala sang nagakaigo nga requirements kag certificate.
Suno kay Ariel Mondejar, barangay tanod sa banwa, Mayo 17 pa lamang nagsugod na sila sa pagbantay sa border kun sa diin ang mga may papeles kag requirements lamang ang ila ginapalabay kaangay sang authority to transport kag certificate nagikan sa Veterinary Health Center.
Suno sa iya, lunsay mga barangay tanod ang nagabantay diri.
Wala man sang may mga nagalapas sa ginapatuman nga layi kag nagapresentar sang nagakaigo nga dokumento ang mga nagalabay.
Aminado naman ang chief executive officer sang Metro Bacolod Chamber of Commerce and Industry nga binilyon ang epekto sang African Swine Fever sa ekonomiya.
Suno kay Frank Carbon, ang swine industry ang sustainable nga palangabuhian sa mga backyard hog raisers samtang nagahatag naman sang income para sa adlaw-adlaw nga kinahanglanon ang commercial ukon pagbaligya sini sa merkado.
Suno diri, binilyon ang epekto sang ASF sa ekonomiya indi lamang sa Negros Occidental kundi pati sa Bacolod City.
