Gindecontaminate ukon ginbutangan sang chlorine ang mga bubon sa Purok Laurel sa Bakyas, Mansilingan, ciudad sang Bacolod kaina sang aga kasunod sang narecord nga kaso sang diarrhea sa lugar.
Sa interview sang Bombo Radyo kay Punong Barangay Rodolfo Pico, lima ka mga bubon ang gintest sa presensya sang e-coli bacteria nga nagatuga sang diarrhea
Santo sa imbestigasyon, may isa ka pumuluyo nga nagbatyag sang diarrhea apang wala man nagbatyag ang iya mga kaupod sa balay.
Suno diri, mahimo nga sa pagkaon nakuha ang bacteria bangud nagkaon ini sang pagkaon nga wala nainit pagkatapos sang birthday kag nagkaon man sang talaba.
Sa karon, OK na ang pamatyag sang pasyente.
Suno diri, sang Martes gintest ang mga bubon bangud sa kaso sang cholera sa lugar.
Suno kay Pico, suspected pa lang ang kaso bangud ginahulat pa ang resulta sang confirmatory test nga ginalauman nga magagwa subong nga hapon.
Samtang wala pa sang resulta, ginkadtuan na sang team sang barangay ang Purok Laurel agud madecontaminate ang tubig sa bubon.
Nag-abiso naman ang Bacolod City Health Office nga indi pagdunganon ang pagsirado sa bubon apang nagpanugyan sa mga pumuluyo nga indi pagdilapan ang bibig kun nagapaligo ukon huluman sa ininit nga tubig ang utensils.
Lima ka mga bubon ang naidentify kun sa diin isa ang private kag ang apat ang gin-install sang barangay.
Ang bubon ang bukas para sa tanan kag ginakuhaan sang mga pumuluyo sa pagpanglaba kag pagpaligo.
Ginakabig naman sang Bacolod CHO nga isolated ang kaso bangud isa man lang ang nagbatyag sang diarrhea.
