Ginbutangan na kaina sang chlorine ang mga bubon sa Purok Luhod-luhod, Barangay Mandalagan kasunod sang narecord nga una nga kaso sang cholera sa nasambit nga lugar.
Sa interview sang Bombo Radyo kay Maria Vida Antipuesto, nurse sang Bacolod City Health Office, ila gintsekyar ang purok kag nahibaluan nga 11 ka bubon ang ginagamit sang mga pumuluyo.
Gani ginpatigayon kaina ang paghulog sang ¼ kilo sang chlorine nga may 70 percent solution nga tunawon sa maalabaab nga tubig sa pagdisinfect sa mga bubon.
Ginselyohan ang mga bubon kag butangan sang oras kun san-o magamit sa liwat bangud sarang naman ini magamit makaligad ang 24 oras.// Pahayag ni Antipuesto, matapos ang disinfection, magamit na ang tubig bilang panghugas sang pinggan, panglaba, kag pangflush sa banyo apang ang tubig nga para sa pagkaon ang kinahanglan gid nga purified.
Ang Purok Luhod-luhod ang ginhatagan sang mga container nga nagikan sa Bacolod City Disaster Risk Reduction Management Office kag tubig gikan sa BACIWA, samtang sirado pa ang bubon sa publiko.
Samtang suno naman kay Jelie Siargan, residente sang nasambit nga purok, sa karun pa lamang nga may hitabo nga nag-eksperyensya ang pila ka mga pumuluyo sang LBM kag nagpositibo sa cholera, sa sulod sang 10 ka tuig nga gamit nila sang bubon.
Apang mineral ang gamit ni Siargan kag sang bana sini sa pagtig-ang, paghugas kag sa pagkaon kung sa diin sila ang nagabakal sang duha ka container sang mineral sa isa ka semana para gamiton sa sulod-balay.
Suno kay Siargan, wala gid sila maayo nagagamit sang tubig sa bubon bangod nga masami may yara sang nagapaligo nga naggamit sang timba nga ginabalik ang tubig rason nga mahigko ini. SAMTANG…ginaplano sang barangay official sang Barangay Mandalagan nga iduso sa Barangay Council ang emergency purchase sang chlorine nga igadisinfect sa mga bubon sa ila barangay kasunod sang una nga kaso sang cholera.
Sa interview sang Bombo Radyo kay Barangay Kagawad Paul Anieve, naghatag ini sang abiso sa mga pumuluyo nga magkuha na sang pondo nga tubig para sa personal nga panggawi kaangay agud nga makabutang sang chlorine sa bubon.
Naghingyo man si Anieve sa Prime Water nga madeliver sang tubig sa Purok Luhod-Luhod kaina sang udto bangud indi magamit ang bubon sa sulod sang 24 oras.
Suno kay Anieve, ang tubig sa bubon ang sarang nga magamit bilang inugbunyag sang tanom, pangflush sang comfort room kag panglaba apang indi pa ini magamit bilang panghugas sang kitchen utensils.
Indi lang Purok Luhod-Luhod ang ginaayo sang barangay official nga mangin aware angot sa cholera kundi ang bilog nga Mandalagan.
Suno kay Anieve, kuntani ipabilin sang mga pumuluyo ang katinlo kag husto nga disposal sang basura bangud ila natalupangdan nga nagabalik ang tubig sa bubon bangud wala nasemento ang palibot sini.
Prayoridad man sang barangay nga masemento ang palibot sang bubon kag matakluban.
Suno sa barangay kagawad, 17 ang kabug-usan nga bubon sa Purok Luhod-Luhod nga butangan nila sang chlorine kag ginbisitahan man ang Purok ABKASA kun sa diin nareport nga may mga pumuluyo man nga nagadiarrhea.
Aminado si Anieve nga maiwat ang supply sang commercial chlorine nga 75 percent ang solution apang nakakita man ini sang mabaklan.
Sa Lunes, magasapol ang Barangay Council kag igaduso ni Anieve ang pagbakal sang tingob nga chlorine agud nga mabutangan ang iban pa nga mga bubon, indi lamang sa Purok Luhod-Luhod.
