Ginkalipay naman sang principal sang Andres Bonifacio Elementary School (ABES 2) ang pagbalik sang Brigada Eskwela.
Sa interview sang Bombo Radyo Bacolod kay Genalyn Masitas, principal 1 sang ABES 2, kadungan sang kick off sang Brigada Eskwela, nagpatigayon sila sang parade kaupod ang pila ka mga stakeholders kag katapo sang Bacolod Police Station 2 sa pagpanguna ni Police Captain Paul Vincent Pendon.
Matapos ang parade nag-umpisa man sila sa pagpaninlo.
Suno kay Masitas, kapin 200 ka mga ginikanan ang nagpakigbahin sa Brigada Eskwela.
Suno diri, nakapatigayon naman sila sang pilot testing sang face to face classes kag 90-95 percent sila nga preparado sa pagbukas sang klase.
Naamat-amatan naman nila ang mga classrooms sang pagtinlo gani sa karun finishing touches nalang ang ila ginapanghimo.
Aminado man ini nga dako nga pagpanghangkat sa mga manunudlo ang pagbalik sang face to face classes.
Gin-athag man sini nga apisar wala sang face to face sa nakaligad nga duha ka tuig, indi matuod nga matawhay ang mga manunudlo bangud nagabalik sila sa mga eskwelahan agud maghimo sang mga modules sang mga estudyante kag nagapasa sang ila man reports.
Nagpasalamat man ini bangud wala ini sang nabatian nga kumod nagikan sa mga manunudlo sang ABES 2.
Ginalantaw man sini nga mahatagan man sila sang service credit sa ila nga pagreport sang August 15-22 agud nga magtapos sang ila mga hilikuton kadungan sang pagsira sang klase para sa school year 2021-2022.
