Gin-isyuhan sang Notice of Violation ang mga establishments sa Barangay Patag kag Barangay Guimbalaon sa syudad sang Silay.
Sa interview sang Bombo Radyo Bacolod kay Silay City Mayor Mark Golez, sang Sabado siya naghatag sang instruction sa joint operation inspection team sang syudad nga inspectionon ang mga establishments sa nasambit nga lugar kag nakita diri nga wala sila sang business permits, building permits kag occupancy permits.
Suno kay Golez, ginhatagan sila sang napulo ka adlaw nga magcomply sang permits apang kun indi, mapilitan ini sa pag-isyu sang cease and desist order kag Notice of Closure sa mga establisyemento.
Suno pa diri, unfair sa mga nagabayad sang tax sa Republika sang Pilipinas kun ang mga ini ang indi magcomply sa permits.
Ginpahayag man sini nga wala man natsekyar sang City Engineer’s Office sang syudad ang mga building sang ginpatindog ini apang salabton sang syudad ingkaso nga may matabo kag wala ginapangayo nga insidente.
Nagakahangawa lamang ini nga mangin kaangay sang Boracay ang kabukiran sang syudad sa palaabuton bangud wala pa mapat-od ang ila solid waste disposal.
Suno pa kay Golez, unfair sa iban nga mga negosyante ang ginahimo sang mga tag-iya sang buildings bangud wala sila nagabayad sang buwis.
Nagpanindugan man ini nga maayo man ang tinutuyo sang mga ini nga maghatag sang ubra sa iban nga pumuluyo apang indi sini pagpasugtan kun ini ang iligal.
Kun luyag na sang mga tag-iya nga magkuha sang permits suno sa iya, magsulat ini sa iya agud maendorso sini sa Protected Area Management Board (PAMB) para sa rekomendasyon bangud kabahin ang Patag kag Lantawan sang Northern Negros Natural Park (NNNP).
