Nagadugok ang pasahero sa Ceres South Terminal sa pagtsekyar sang Bombo News Team kaina sang udto.
Kapin alas-12:00 kaina sang udto, nagadagsa ang mga pasahero nga padulong sa nanarisari nga banwa kag ciudad sa sur nga bahin sang probinsya sang Negros Occidental, agud maghingagaw pauli para sa Bag-ong Tuig.
Sa pihak nga bahin, magamay lamang ang numero sang mga nagsulod sa ciudad.
Nangin organisado naman ang plastada sang terminal kun sa diin may ginhamtang nga mga baral agud isa lamang ang flow sang mga pasahero.
Madamo man sang mga makita nga nagadala sang dalagko nga mga bags, karton kag sinako nga padulong sa sur nga bahin sang probinsya.
Sa interview sang Bombo Radyo Bacolod kay Christian Paderna, siya ang nagatrabaho sa Barangay Fortune Town, Bacolod City kag kaupod sa iya manghod, sila ang magabyahe pauli sa banwa sang La Castellana para sa bag-ong tuig.
Nagalaom ini nga mangin progresibo ang iya 2024.
Samtang benepisyo naman para sa vendor nga si Nene Baling ang pagdagsa sang mga pasahero.
Sini diri siya ang malawig na nga nagabaligya sang mga pangpasalubong nga pagkaon sa atubang sang Ceres South Terminal.
Suno diri, madamo man sang mga nagabakal sa iya partikular na sa mga papauli sa ila banwa ukon ciudad sa probinsya sang Negros Occidental para sa New Year’s eve celebration.
Magluwas pa diri, nagdamo man ang mga pasahero bangod madamo sang mga gikan pa sa nanarisari nga bahin sang Pilipinas kag abroad nga nag-abot para sa bag-ong tuig.
Nagalaom ang vendor nga madamo pa sang magahingagaw bwas besperas sang New Year’s day.
Pangabay sini para sa 2024 ang maayo nga lawas para sa iya kag sa iya pamilya.
