Tipunon pa sang Bacolod Police Station 1 ang mga CCTV footages sa palibot sang Locsin-Cuadra Streets, sa Barangay 12, Bacolod City agud makabulig sa pagtumod sa suspect nga nagluthang patay sa menor de edad nga imbulbado sa pag-abduct sang 5 anyos nga bata nga babayi sa Talisay City.
Madumduman nga si Danica, ang gin-abduct nanday Makoy, 18 anyos kag Dean Rod Cepeda, 12 anyos gikan sa Purok Water Lily, Barangay Zone 10, Talisay City sang Hulyo 1 kag Hulyo 2 sang kaagahon na sang marecover sa La Salle Avenue, Barangay Villamonte, Bacolod City.
Si Makoy ang ginpasakaan sang kaso nga abduction samtang si Dean Rod ang natalana pa kuntani nga ipaidalum sa neurological test agud matumod kun matuod nga may deperensya sa paminsaron.
Apang kaina pasado alas-2:00 sang kaagahon, si Dean Rod ang ginluthang samtang nagatulog sa tabok sang Bacolod City Public Plaza.
Ang suspect nga nakamotorsiklo kag nakahelmet ang ginapahayag nagasunod-sunod na sa biktima sang temprano pa lamang kag sang nagakatulog na, didto na sini ginpalapitan kag ginluthang sa ulo.
Sa CCTV, ginalantaw nga makabulig sa imbestigasyon ang panapton, body built kag feature sang motorsiklo sang suspect.
