Natalana nga ipaidalum sa stress debriefing ang mga narescue nga crew sang FV St. Peter the Fisherman II nga naglugdang sa tunga sang Sicogon Island sa Carles, Iloilo kag ciudad sang Cadiz, Negros Occidental sang Biyernes.
Suno kay Negros Occidental Board Member Jongben Mirhan, makig-angot ini sa Negros Occidental Provincial Government kag Provincial Disaster Risk Reduction Management Office (PDRRMO) agud nga mapatigayon ang stress debriefing sa 22 nga una nga narescue.
Suno kay Mirhan, kalabanan sa mga pamilya ilabi na ang mga asawa sang mga survivors ang gilayon man nga nagpadulong sa Cadiz City port.
Sa ila pag-abot sa takas, gilayon man nga ginseguro sang DRRMO nga mapasuksok ang mga ini sang facemask kag ginseguro man ang pagtuman sa social distancing sa accomodation area sang Cadiz City Port bilang kabahin sang COVID-19 related protocols.
Kuntani, ihold naman ang mga ini sang Biyernes sang gab-i sa pasilidad agud nga mamonitor, apang bangud okay ang ila nga vital signs gani ginpahanugutan ang mga ini nga makapauli.
Ginpanugyan mismo sang doktor nga mas makabulig kun makapauli ang mga ini sa ila panimalay agud ma-agubayan ang mga ini sang ila mga palangga sa kabuhi.
Advice man sang doktor sa pamilya nga likawan anay nga ipahanumdom sa mga survivors ang insidente.
Ini agud nga indi magbalik sa ila nga pinsar ang trauma.
Gindumdom pa ni Mirhan nga isa sa 22 nga mga crew ang nagakurog sa kakulba sang mag-abot sa puerto bangod sa trauma gani gintugyan gid sang mga ini sa asawa sang biktima nga bantayan ang bana.
Bangud sini, nakita nila nga dako ang importansya nga mahatagan sang stress debriefing ang mga biktima.
