Ginpahayag sang National Grid Corporation of the Philippines – Visayas nga liwat nga nagdulungan ang outages sang mga dalagko nga power plant rasun nga nagbalik ang yellow kag red alert sa Visayas Grid.
Sa interview sang Bombo Radyo Bacolod kay Michelle Visera, Regional Corporate Communication Officer sang NGCP-Visayas, liwat nga nadisconnect ang isa ka dako nga power plant sa Panay, kag ang sa Cebu.
Suno diri, sarang kuntani nga makakuha sang supply sa Mindanao bangod sa interconnection, apang natabuan nga kaangay man nga may nagdisconnect nga planta sa Mindanao.
Pahayag ni Visera nga kapin isa ka semana na nga maeksperyensyahan ang yellow kag red alert status.
Alas-8:00 kaina sang aga nagdeklarar sang yellow alert nga nagakahulugan nga maninit ang supply.
Apang kun magdeklarar sang red alert, nagakahulugan nga kulang nagid ang supply kag magapatuman na sang manual load dropping.
Pahanumdom ni Visera nga wala sang control ang NGCP sa mga power plant gani indi sila makapasalig kun san-o ang mga ini makabalik sa Visayas Grid.
Ang ila lamang nga mapasalig nga nagapreparar ang NGCP agud inkaso nga handa na ang mga planta nga magreconnect, gilayon nila ini nga mapasulod.
Pahanimdom sini nga nagaserbe lamang nga highway ang NGCP, ukon alagyan sang kuryente gikan sa planta padulong sa mga distribution utilities, nga amo ang nagasupply sa mga konsumedor.
Ginarekomendar nila ang pagtipid sang kuryente apang aminado man si Visera nga sa kainit sang tiyempo indi gid malikawan ang paggamit sang mga pumuluyo sang electric fan ukon aircon.
