Ginreklamo sang mga pumuluyo ang guba nga dalan sa bahin sang Brgy 2, Bacolod City.
Sa interview sang Bombo Radyo kay Alyas Rommel, Ebike driver, ang guba sa dalan ang ginareklamo sang mga nagabyahe sa area kun sa diin madamo sang nagkalaguba nga mga motorsiklo kag kun kaisa may nagaluntad nga aksidente.
Suno diri, kun malabyan ang dalan, mayab-ok ang area nga ginareklamo man sang mga nagalabay nga estudyante.
Ang dalan ang ginguba sang tuig 2024 kun sa diin ginbakbak ang semento, kag ginbayaan kun sa diin ginbutangan lang ini sang steel plate kag ginbayaan.
Samtang, indi naman makapahuway sang insakto ang pila ka pumuluyo bangod sa gahod kun malabyan ang steel plate sa dalan.
Suno kay alyas Nene, residente sang Brgy 3, ang ila balay ang malapit sa guba nga dalan kag suno sa iya kagahod gid kun malabyan ang steel plate nga nagadistorbo sa pagpahuway sang tawo.
Suno diri, ginabalik-balik man sang mga nagatrabaho ang area kun nagakahuslo ang steel plate.
Nagapanawagan sila sa karun nga makay-o na ang dalan nga distorbo sa pumuluyo kag makatuga pa sang aksidente.
Samtang, Ginalauman nga matapos sa bulan sang Marso subong nga tuig ang ginaconstruct nga dalan malapit sa Bacolod City Government Center.
Sang tuig 2019, gin-umpisahan ang drainage project sa atubang sang Bacolod City Government Center kag natapos sang 2020.
Apang sang tuig 2024, may gintrabaho nga drainage system sa tabok naman sang Bacolod City Government Center kun sa diin ginconstruct man ang concrete box culvert, kag pagpalapad sang dalan kag sidewalk.
Sa interview sang Bombo Radyo Bacolod kay Department of Public Works and Highways – Bacolod City head Engr. Leah Jamero, yara na sa 70 percent completion ang construction kag ginalauman nga matapos na ang tanan sa Marso.
Suno diri, may tion nga ginasuspend ang trabaho bangod sa underground utilities nga naga-apekto sa implementasyon.
Ang ginatrabaho sa karun sa dalan ang may kalabaon nga 327.3 lineal meters.
Pahayag ni Jamero, nagapangayo sila sang pag-intindi sang pumuluyo kag motorista samtang nagapadayon pa ang construction sa dalan.
