Ginkumpirmar sang alkalde sang Binalbagan, Negros Occidental nga matawhay na ang banwa kag mahimo na malabayan ang mga dalan matapos nga ginbaha ang 13 ka barangay bangud sa pag-ulan dala sang Hangin Habagat nga ginpabaskog sang Bagyo Crising.
Sa interview sang Bombo Radyo Bacolod kay Binalbagan Municipal Mayor Emmanuel Aranda, ang banwa matawhay na kag ang pila ka mga evacuees ang nakabalik na sa ila nga lugar magluwas nalang sa mga residente nga nagapuyo sa manubo nga lugar.
Suno kay Aranda, maayo naman ang ila nga sitwasyon kag ginpasalamatan sini ang mga pumuluyo nga nagkooperar sa tion sang ginpatigayon nga evacuation bangud sa mga pagbaha.
Suno sa alkalde madamo sang mga Barangay nga ginbaha sa banwa bangud nanubuan sila kag ang tubig halin sa onse ka mga Local Government Units nagikan sa Negros Oriental kag Occidental ang nagagwa sa banwa sang Binalbagan.
Isa na diri ang nagikan sa ciudad sang Canlaon, Negros Oriental.
Samtang may yara naman sang ginhatag ang Local Disaster Risk Reduction Management Office sang Binalbagan kag ang Barangay sang bulig sa pamilya sang menor de edad nga nalumos matapos nga magtabok sa old Overflow upod ang iya iloy.
Ginapahayag man nga gin-atake sang epilepsy ang bata nga isa man sa rason sang pagkalunod sini.
Ginatipon pa sang banwa ang mga datos nga mahibaluan kun pila ang nangin kahalitan sang pagbaha.
