Nagpanugyan ang Bacolod City Health Office sa mga pumuluyo nga magsuksok sang facemask kun maggwa sa balay bangud sa risgo sa ikaayung lawas dala sang haze gikan sa forest fire sa Indonesia.
Sa interview sang Bombo Radyo kay CHO Environment and Sanitation Division Head Dr Grace Tan, ginpanugyan sini sa mga nagamaneho nga maghalon bangud sa problema sa visibility tuga sang haze nga posible magresulta sa aksidente sa dalan.
Samtang, suno kay Tan, mataas man ang risgo sa mga tawo nga may asthma kag iban pa nga pulmonary ukon respiratory conditions.
Panugyan sini magsuksok sang well-fitted nga facemask agud malikawan ang pag-inhale sang magagmay nga particles.
Para naman sa mga yara sa sulod sang balay, ginpanugyan ni Tan nga sirad-an ang mga bintana kag pwertahan agud malikawan ang pagsulod sang aso.
Dugang pa, mahimo man nga patas-an ang ventilation ukon pagbutang sang basa nga tela sa palibot sang balay agud makabulig sa pag-absorb sang particles.
Kahapon, suno kay Tan yara sa light to moderate ang haze sa ciudad.
Apang kaina sang aga, ginkumpirmar sang EMB NIR nga nagdangat na sa ‘very unhealty’ ang air quality level sa ciudad sang Bacolod.
Sa pihak sini, pahayag ni Tan, padayon ang ila pakigkoordinar kag ang monitoring sang Bacolod City Disaster Risk Reduction and Management Office (CDRRMO) kasubong man sang EMB NIR sa sitwasyon. Samtang, ginpahayag sang isa ka medical doctor sa Negros Occidental nga ang haze ukon ang aso nga halin sa forest fire sa Indonesia ang may upod nga particles kag pollutants nga delikado sa ikaayong lawas sang tawo.
Sa interview sang Bombo Radyo Bacolod kay Dr. Vicente “Itik” Iturriaga, kasunod sang naeksperyensyahan nga haze dapat likawan nga magwa sa balay kag kun magwa man dapat magsuksok sang N95 facemask.
Suno kay Iturriaga mahimo nga maapektuhan sang haze ang mata, baga, panit kag respiratory system sang isa ka tawo.
Panugyan ni Iturriaga nga kun may yara na sang ginabatyag nga indi maayo sa ikaayong lawas magpakonsulta gilayon sa espesyalista indi na paghulaton nga maglala pa.
