Ginpanindugan sang Deputy for Medical sa Bacolod Emergency Operation Center (EOC) nga sa ila pag-atubang sang mga kaso may kaangtanan sa resulta sang RT-PCR test, kabahin sa ila konsiderasyon ang integridad kag kredibilidad sang mga molecular laboratories.
Paathag ni Dr. Chris Sorongon nga masobra na sa isa ka tuig ang pag-operar sang Molecular Laboratory sa syudad sang Bacolod, lakip na ang sa Corazon Locsin Montelibano Memorial Regional Hospital (CLMMRH) kasubong man ang sa mga pribado nga ospital kag private institutions.
Panindugn ni Sorongon nga ang mga MoLab ang may dako nga kontribusyon sa pagpanubo sang kaso sang COVID-19, bangod ini sila ang nagadeterminar sang mga kaso kag ang data gikan diri amo ang ginasundan sa pag-implementar sang sistema kag proseso sang EOC kaangay nalang sa kun paano ginahandle ang mga positibo sa COVID-19.
Paathag ni Sorongon nga sila ang magasalig gihapon sa resulta nga positibo apisar nga may negative RT-PCR test result na ang mga ini.
Suno kay Sorongon ang mga eksperto ang permi nga nagahalong, gani magapanindugan ang mga ini sa positibo nga resulta.
Ginpakigbahin man sang doktor nga may-ara naman sang ginatawag mga asymptomatic carriers, kun sa diin apisar nga nagadala sang virus, wala na ang mga ini sang ginbatyag.
Paathag man sini nga gold standard ang RT-PCR testing sa pagtumod kun positibo ukon indi gani nagasalig ang mga doktor sa pagbasa sang machine.
Pasalig naman sini nga ma-id-id ang proseso sa pag-accredit sa mga Molab.
Dugang pa sini nag ginapaidalum man sa preventive maintenance kag may ginabuhat man nga recalibration ang tanan nga makina sa mga Molecular Laboratory.
Matapos sang pagrun sang mga RT-PCR machine, may pathologist naman nga amo ang nagavalidate kag nagaverify sa resulta nga ginpagwa kun sa diin may nanarisari man nga test result kag sunod-sunod nga verification agud makasiguro nga mangin valid ang resulta.
