Indi pa matumod sang team ni Bacolod City Mayor Alfredo Benitez kun kumpleto ang mga dokyumento nga ginturnover sang Leonardia administration kadungan sang pagsugod sang termino sang bag-o nga alkalde kahapon, Hunyo 30.
Suno kay Secretary to the Mayor Atty. Joseph Chiu, ginhatag sang transition team ni Leonardia ang mga dokyumento nga nalista sa circular sang Department of the Interior and Local Government apang wala pa ini nabasa gani indi pa matumod kun may missing.
Suno kay Chiu, halos general man ang nakabutang sa roster sang organizational chart sang Bacolod City government bangud ginbutang lang ang ngalan sang mga departamento kag numero sang mga empleyado.
Suno diri, kuntani ginhatag sang previous administration ang current organizational chart.
Sa karon, indi pa man mahambal kun kumpleto ang mga equipment sa Mayor’s Office bangud wala man sang listahan kundi ginbutangan lang sang General Services Office sang sticker ang mga bangko kag mga lamesa.
Indi man mahambal nga missing ang mga yabi kundi isa lang ang yabi nga ginhatag nga iya sang main door.
Suno diri, wala sila sang iban nga mahimo kundi batunon ang nagaisahon nga yabi.
