Indi magnubo sa 60 ka mga driver kag konduktor sang Vallacar Transit Incorporated nga nagabyahe sa Negros Occidental ang ginpaidalom sa random drug test kaina sang aga.
Suno kay Agent Bamboo, assistant provincial officer sang PDEA Negros Occidental, ang random drug test ang kabahin sang Oplan Harabas nga tuigan nga ginapatigayon nationwide nga inisyatibo sang nagkalain-lain sang ahensya sang gobyerno kaangay sang Philippine Drug Enforcement Agency, Land Transportation Office, Department of Health kag Highway Patrol Group.
Suno kay Agent Bamboo, ang random drug test ang tuigan nga ginapatigayon kun sa diin sorpresa ini nga ginapatigayon antes ang Semana Santa agud masiguro nga hilway sa illegal drugs ang nagamaneho sang pampubliko nga salakyan ilabi na ang long distance travel.
Subong nga adlaw, mga driver kag konduktor ang target nga mapaidalom sa drug test apang ang mga opisyales nalang sang terminal ang nagpili.
Suno kay Agent Bamboo, 35 tubtub 40 ka driver ang napaidalom sa drug test sa south terminal kag 35 man sa north terminal.
Kun may bilin pa sa testing kit suno kay Agent Bamboo, magaproceed man sila sa mga local terminal sa Bacolod agud mapaidalom man sa test ang mga nagabyahe sang public utility jeepney sa ciudad.
