Hapaw lang ang kalipay sang mga driver sang pampubliko nga salakyan sa Bacolod sa advisory sang Department of Energy nga may bigtime rollback sa presyo sang produktong petrolyo sa masunod nga semana.
Suno sa DOE, indi magnubo P12.50 ang iganubo sa presyo sang kada litro sang diesel samtang indi naman magnubo sa P6.57 ang rollback sa kada litro sang gasolina.
Sa interview sang Bombo Radyo sa PUJ driver nga si Ramon Polarion, mahimo nga agi man lang ang pagnubo samtang dako naman ang ginapatong sang mga oil companies kun may yara sang price hike.
Suno kay Polarion, mabudlay magpasaka sang pamasahe apang madasig lang ang saka sang presyo sang gatong.
Suno diri, mahina ang byahe sa karon bangud kadugay sang ila pundo sa terminal antes makagwa.
Suno sa isa pa gid ka PUJ driver nga si Desiderio Enisimo, mas maayo gid kun marollback ang presyo sang diesel bangud tuman kadako ang kinahanglan nila nga patakason sa karon, nagikan sa P1300 padulong sa P1700.
Suno kay Enisimo, P200 nalang ang madala niya pauli bangud mataas ang presyo ang gatong gani halos wala na sila sang inugbakal sang pagkaon.
Suno sa PUJ driver, dako nga bulig sa ila kun magnubo ang presyo sang diesel.
Suno naman sa taxi driver nga si Rolando Ambrosio, indi gid makontrol sang gobyerno ang saka-panaog sang presyo sang gatong.
Suno diri, dako ang nagadugang sa presyo kada semana apang gamay lang ang rollback gani indi makabawi ang mga motorista.
Suno kay Ambrosio, kuntani amat-amaton lang sang mga kompaniya sang langis ang pagpasaka kag indi paggulpihon.
