Nagalaom ang mga driver sang public utility jeepneys sa Bacolod nga mangin tayuyon na ang pagnubo sang presyo sang diesel kag gasolina agud makabawi naman ang mga ini sa ila nga gasto adlaw-adlaw.
Kaina sang aga, nagnubo ang presyo sang gasolina sang P5.70 kada litro, samtang P6.10 naman ang rollback sa kada litro sang diesel.
Sa interview sang Bombo Radyo kay Rolando Catalogo nga nagabayahe sang PUJ nga Bata-Libertad, P300 lang ang income nga madala niya pauli tubtub kahapon bangud masobra P80 ang presyo sang diesel.
Suno diri, dako gawa ang P6.10 nga rollback kag dako man ang madugang sa ila nga income.
Sa karon, wala pa sang taripa ukon fare matrix si Catalogo agud nga makasukot na sang P11 nga pamasahe sa tanan nga mga pasahero kasunod sang mandu sang Land Transportation Franchising and Regulatory Board.
Suno kay Catalogo, may mga pasahero na gid man nga nagaplete sang P11 apang ang iban ang nagabayad lamang sang P10.
Kun P20 ang gindaho sang commuter kag mangita ini sang P10 nga sinsilyo, ginahatag nalang ini ni Catalogo agud nga wala sang gamo.
Nalipay naman ang nagabyahe sang Mandalagan-Libertad nga si Jarlene Esparas bangud may rollback subong nga adlaw.
Suno diri, maayo gid bangud may pagnubo, apang mas maayo pa gid kun magbalik sa P60 ang presyo sang kada litro sang diesel.
