Pabor ang mga driver sang pampubliko nga jeep sa Alangilan-Granda-Burgos Jeepney Terminal sa Libertad Public Market sa gin-anunsyar sang Department of Transportation (DOTr) nga paluson na sumugod sa Nobyembre 4 ang plastic barriers kag pasakaan ang passenger capacity sa 70 porsyento.
Suno kay Ramon Susana, driver sang jeep nga may ruta nga Burgos-Granada, malipayon ini bangod mahimo nga ma-umpawan na ang mga ini sa tion nga paluson ang plastic barrier kag mapasakaan ang porsyento sang masakay nga pasahero.
Pahayag sini nga indi na nila ma-agwantahan ang tuman nga pagtaas sang presyo sang krudo kun magapabilin nga manubo ang ila nga capacity sang mapasakay.
Suno kay Susana, P18 ang sukot sang mga ini padulong sa Barangay Granada kun sa diin sarang sila maka-income sang matinlo na nga P200 tubtob P250.
Ini nalang ang mabilin suno sa driver bangod pagabuhinan pa ang iya nga income sa plete sang arkila sa jeep nga P350 kag ang krudo.
Si Susana ang makabyahe nalang sang tatlo tubtob apat ka byahe sa kada adlaw.
Pahayag sini nga kun paluson ang plastic barrier kag mapahanugutan ang 70 porsyento sang passenger capacity, gikan sa anom-anom sa kada bahin kag isa sa atubang ukon 13, mahimo naman nga magsaka ini sa 15 ka pasahero.
Sadto P14 ang sukot padulong sa Barangay Granada apang ginpasaka ini bangod sa pagnubo sang pasahero sa P18 kag may taripa man ang mga ini gikan sa Land Transportation Franchising and Regulatory Board (LTFRB).
Samtang pabor man kay Nestor Ferarin, driver sa Burgos-Granada nga Jeep ang pagpalos sang plastic barrier agud magtawhay ang ila nga pagbyahe.
Pahayag sini nga makaganar ini sang P1,000 sa isa ka adlaw nga pagbyahe kun sa diin nagabayad ini sang arkila sa jeep nga P300 kag nagadangat sa P400 ang ginagastos sa krudo.
Nagalaom man ini nga makabulig-bulig ang pagsaka sang kapasidad sang pasahero nga mapasakay bangod may tatlo pa ini ka kabataan kun sa diin duha ang naga-eskwela.
Ginapakamaayo man sang isa ka pasahero kun mapalos na ang barrier agud nga magtawhay na ang ila nga byahe. Suno kay Jonathan, ginpatuman ang pagbutang sang plastic barrier agud nga malikawan ang paglatun sang COVID-19 apang sa karun nagnubo naman ang kaso sa syudad kag madamo na sang nabakunahan gani pabor ini nga hukson na ang pagpatuman.
Apisar sini dapat gid gihapon nga mapatuman ang social distancing.
