Ginkumpirmar sang head sang Disaster Risk Reduction and Management Office sang banwa sang La Castellana kag ciudad sang Bago nga may booming sound nga nabatian kadungan sa paglupok sang Bulkan Kanlaon.
Sa interview sang Bombo Radyo Bacolod kay La Castellana Municipal DRRMO Head John de Asis, bangod wala man sang gal-om, sang nabatian sini ang ‘booming sound’ ukon pagsigabong, na-antisipar na sini nga naglupok ang Bulkan Kanlaon.
Suno sa iya, nakaligad nga adlaw pa nagsaka ang mga volcanic activities.
Pahayag sini, nga una nila nga narecord ang pagsaka sang seismic activity sang Biyernes, samtang sang Lunes, may pila naman ka Barangay nga nagreport nga nakapanimaho sang asupre.
Sa pagluntad sang Moderately Explosive Eruption, sila ang nagdispatch naman sang team para magtsekyar sang mga Barangay.
Sa karun wala pa sang nakareport nga naka-eksperyensya sang ashfall.
Panugyan sini nga sirad-an ang mga bintana kag piertahan kag magsuksok sang facemask, kag hinali nga may magluntad nga emerhensya, magdial lamang sa 911.
Sa pihak nga bahin, nagdul-ong na sang facemask ang Bago CDRRMO sa mga Upland Barangay nga mahimo maapektuhan kun may ara sang ashfall ukon sulfuric smell.
Sa interview sang Bombo Radyo Bacolod kay Bago CDRRMO Head Dr. Merijene Ortizo, nabatian man ang ‘booming sound’ sa Barangay Ilijan, Mailum, Binubuhan, Don Jorge Araneta kag Ma-ao.
Gilayon man ini nga nagmando sang pagdeliver sang facemask sa nasambit nga mga Barangay para sa preposition, agud magserbe pangaman inkaso kinahanglanon sang mga pumuluyo.
Suno kay Ortizo, apisar nga yara sa karun sa Manila si Mayor Mayette Javelana, gilayon ini nga nagtawag kag naghatag sang instruction nga hatagan sang prayoridad ang mga upland Barangays.
