Ginpasaka na ang kaso sa piskal batok sa mga suspetsado nga nakuhaan sang minilyon ka pesos nga balor sang suspected shabu sa magkasunod nga buybust operation sa Barangay Tangub kag Barangay Singcang-Airport, ciudad sang Bacolod.
Madumduman nga sa ginpatigayon nga operasyon sang Bacolod City Drug Enforcement Unit sa Lopue’s South Square sa Barangay Tangub, naaresto sanday Jerome Paurillo, 37 anyos, wala sang trabaho, miyembro sang Bugalon Drug Group, residente sang Kamang-kamang, Isabela, Negros Occidental; kag duha ka ginakabig nga mga High Value Individuals nga sanday Lloyd Paul Toculan, 29 anyos, nagatrabaho bilang construction worker, residente sang Zarandin, Valladolid, Negros Occidental; kag Aive Jean Colonia, 32 anyos, residente sang Barangay Nanunga, Hinigaran, Negros Occidental.
Narecover sa mga ini ang 300 grams sang ginasuspected shabu nga nagbalor sang P2,040,000.
Samtang sa kasunod nga operasyon sa Purok Uno Sisi, Barangay Singcang-Airport, narecover naman ang tatlo ka knot tied kag onse ka sachet sang suspected shabu nga ginabanta nagabug-at 255 grams kag may standard drug price nga P1,734,000 sa maglive-in nga sanday Marivic Montes alias Madam, 54 anyos kag Ray-An Espinosa, 39 anyos, lunsay mga food vendor, kag tumandok sa banwa sang Valladolid, Negros Occidental
Sa interview sang Bombo Radyo Bacolod kay Police Lt. Col. Antonio Benitez Jr., pinuno sang Bacolod City Intelligence Unit kag CDEU, napasaka na nila sa piskal ang kaso sa paglapas sang Republic Act 9165 ukon Comprehensive Dangerous Drugs Act of 2002.
Sa karun ang mga suspect ang nakahunong sa Bacolod Police Station 8.
Padayun man ini nga nagapangayo sang suporta sang mga pumuluyo sa kampanya batok sa illegal nga droga pinaagi sa pagsugid sa mga kapulisan kun may mahibaluan nga naga-engaged sa illegal drugs trade sa mga himata ukon kaingod.
