Nakumpiskar ang mapa, sketch plans kag mga litrato ni Negros Oriental Governor Roel Degamo kag sang iya nga balay matapos ang pagserbe sang search warrant sa balay sang duha ka mga kasunsabo sa pagpatay sa gobernador kag walo ka iban pa.
Suno kay Special Task Force-Negros chairman Interior Secretary Benhur Abalos Jr., ang search warrant batok kay certain Nigel Eloctono ang nagresulta sa pagkumpiskar sang firearms, ammunitions, hand grenade, litrato ni Governor Roel Degamo kag sang pamilya sini, mapa, litrato sang gate sang balay sang gobernador kag iban pa nga items nga ginapatihan nga gingamit sa planning stage sang assassination.
Suno kay Abalos, sa ikaduha nga search warrant batok sa wala ginhingadlan nga suspetsado, nakumpiskar man ang mga armas, granada, sketch kag litrato sang balay.
Ini matapos ang raid sa 5-hectare property sa Barangay Caranoche, Sta. Catalina town, kalakip na ang sugar mill nga gina-operate ni HDJ Bayawan Agri-Venture Corp. kun sa diin ang presidente amo si Negros Oriental Governor Pryde Henry Teves ang manghod ni Negros Oriental Rep. Arnolfo Teves Jr.
Ang asod-asod nga raid ang ginpatigayon matapos ang pagpatay kay Negros Oriental Governor Roel Degamo kag walo ka iban pa samtang 16 ang nasamaran sa balay sang gobernador sa banwa sang Pamplona, Negros Oriental sang Marso 4.
Ginpahayag naman ni Justice Secretary Jesus Crispin Remulla nga si Teves ang ginakabig nga isa sa duha ukon tatlo ka masterminds sa Degamo slay case.
