Naghatag sang isa ka bulan nga ligwa ang alkalde sang La Carlota City sa mga empleyado agud makapabooster shot batok sa COVID-19 antes gin-implementar ang executive order nga nagadumili sa mga ini kasubong man sa mga magatransaksyon sa pagsulod sa city hall kun indi boosted batok sa virus.
Suno kay Mayor Rex Jalando-on, antes gin-implementar ang nasambit nga executive order sang Hulyo 1, nagpagwa na ini sang mando sang Hunyo 1 pa lamang agud mahatagan sang isa ka bulan nga ligwa ang mga empleyado agud makapabooster shot.
Suno kay Jalando-on, ini ang gin-implementar sa ciudad bangud sa manubo nga numero sang mga nagapabooster indi lamang sa ciudad kundi sa bilog nga probinsya kag daw kaangay nga nalipatan na lamang sang mga pumuluyo.
Suno sa iya, antes makasulod ang empleyado sa city hall kasubong man ang mga pumuluyo, dapat magpakita sila sang vaccination card nga sila ang nakapabooter na.
Kun wala pa nakapabooster, sarang naman nga makapakita sang negative rapid antigen test result nga gin-issue sang nagligad nga duha ka semana.
Handa naman ang alkalde nga untaton ang ini nga polisa kun makabaton sang mando nagikan sa national government apang sa karun wala man ini sang may nabaton nga direktiba.
