Indi mahimo nga masweldohan ang mga empleyado sang Barangay Handumanan, Bacolod City bangod nga wala na sang budget ang barangay kun sa diin nagdangat sa P1.8 million ang utang sini.
Sa interview sang Bombo Radyo kay Punong Barangay Febe Legaspi, ila ginpilit sa bulletin board sa gwa sang barangay hall ang lista kag mga resibo sang tanan nga gasto kag bill nga wala nabayaran sang Barangay sa tuig 2023 sa idalum sang former adminstartion antes pa ini magpungko bilang Punong Barangay.
Suno diri, nagakadapat gid lamang nga mahibaluan sang pumuluyo sang barangay Handumanan kun ano ang nagakatabo sa barangay kag kun diin nagkadto ang kwarta.
Sa 2023 budget sang Brgy nga P30,050,066, may yara lamang sang ginbilin nga P521,955.52 ang former adminstration kun sa diin nagdangat sa P1,830,076.53 ang deficit.
May yara sang mga bill sa tubig kag suga nga wala nabayaran kag sa karun duha na ka bulan nga wala nahatagan sang sweldo ang mga empleyado sang Barangay.
Suno kay Legaspi, nagapangita pa ang barangay council sang solusyon kun paano masolbar ang ini nga problema apang aminado ini nga mangin kabudlayan para sa ila ang 2024 budget.
Pahayag ni Legaspi, sang ini ang nanaog sadto bilang punong barangay natransfer sini sang husto ang budget apang sang siya sa karun nakabalik sa pwesto halos wala na sang budget ang barangay.
Samtang, natigayon naman ang fiesta sang barangay bangod sa bulig kag suporta nga ila nabaton.
