Magabaton sang dugang nga bonus ang mga empleyado sang syudad sang Bacolod kadungan sang pagpagwa sang presidente sang administrative order angot diri sang damlag lang.
Sa interview sang Bombo Radyo kay Bacolod City Treasurer Geovani Balalilhe, ang paghatag sang P10,000 Special Recognition Incentive (SRI) sa mga city government employees ang one time payment lamang kag ginalantaw man sini nga mahimo mangin tuigan na ang paghatag sang Special Recognition Incentives sa mga government employees.
Ang Bacolod City Hall employees ang magabaton sang dugang nga 10,000 bonus magluwas sa lima ka iban pa nga cash incentives nga ila nabaton sa bulan sang Nobyembre kag Disyembre.
Ang dugang nga P10 mil nga SRI ang ginmando ni President Rodrigo Duterte.
Nag-issue ang presidente sang Administrative Order No. 37 sang December 8 nga nagapahanugot sa mga local government units nga maghatag sang one-time SRI sa mga government employees sa uniform rate nga indi magsobra sa P10,000 kag dapat irelease halin December 21 pasaka.
Suno kay Balalilhe, ang makabaton sini ang ginlakipan sang mga empleyado nga regular, contractual, ukon casual positions.
Ang pondo ang natalana nga ideterminar sang Sangguniang Panlungsod ang nakadepende sa financial capability sang syudad kag subject man sa Supplemental Guidelines nga ginpagwa sang Department of Budget and Management.
Samtang, nakabutang sa order ni Duterte, nga ginakilala sang administrasyon ang value kag importansya sang government employees para sa ila partisipasyon kag kontribusyon sa paghatag sang serbisyo publiko.
