Respeto ang ginapangayo sang General Manager sang Central Negros Electric Cooperative sa mga empleyado sang kooperatiba sa ila ginaplano nga strike nga suno diri wala sang problema basta ini indi makahalit sa ila nga responsibildad sa trabaho.
Sa interview sang Bombo Radyo kay Atty. Arnel Lapore, nabaton sini ang notice of strike sang mga empleyado sang CENECO, kag sa nakuha sini nga impormasyon, isa sa rason amo ang Union Busting nga suno kay Lapore, wala man sang amo sini nga gawi nga nagakatabo sa sulod sang kooperatiba.
Suno diri, wala sang diskriminasyon, ginabawal, ukon ginapiilit sa mga empleyado sa kun ano man ang luyag nila nga hiumuon, mahimo gid nila.
Apang, para kay Lapore, respeto ang ginapangayo sini nga kun oras sang trabaho, I-trabaho ang ginhatag nga resposibilidad sa ila.
Dugang pa niya, wala sang ano man nga butang nga maka-impluwensya sa trabaho ukon makapadula sang gana sang empleyado ang ginahimo sang union.
Luyag man sini nga hatagan sang respeto ang maayo nga serbisyo nga mahatag sa konsumedor sang Joint Venture Agreement, ini kasunod sa nagalapta nga spekulasyon nga ini makahalit sa pamilya kag publiko.
Apang, pahayag ni Lapore, mabudlay pukawon ang tawo nga nagapakuno-kuno nga tulog, ini ang mga tawo nga sirado ang paminsaron nga indi na makahibalo kun paano mamati sa ginaplastar nga kamaayohan para sa tanan.
Nagapanawagan man ini sa mga kaupod sa CENECO nga maminsar sang madalom antes maggiho batok sa kooperatiba.
Samtang, naaprubahan na sang National Electrification Administration (NEA) ang duha ka adlaw nga dugang para sa pagboto sa plebisito.
Ang pagboto sa plebisito patigayunon sa Hunyo 24 kag 25, Hulyo 1, 2 , 8 kag 9.
