Nagpadala sang complaint letter ang Progressive Alliance of Capitol Employees (PACE) kay Negros Occidental Governor Eugenio Jose “Bong” Lacson batok kay anay Provincial Human Resource Management Office Head Atty. Annabelle Palic.
Sa interview sang Bombo Radyo kay PACE President Renelo Lastierre, ginpahayag sini nga nagpasa ini sang complaint letter kahapon ukon PACE Resolution 2021-18 sa gobernador paagi kay Provincial Administrator Atty. Rayfrando Diaz tuhoy sa indi matarong nga pagpamuno ni Atty. Palic sa PHRMO.
Suno diri, nalakip sa mga reklamo batok sa anay pinuno amu ang acts of oppression, prejudicial to public interest kag grave abuse of discretion.
Ang nasambit nga resolusyon ang ginpermahan sang masobra 600 ka mga miyembro sang PACE.
Nagapati ang mga ini nga ang pagtinir ni Palic sa kapitolyo ang prejudicial sa interest sang provincial government kag makatuga sang kahalitan sa administrasyon.
Gindugang man sini nga apektado ang pagsinalayo sa kapitolyo kun ini ang magapabilin didto.
Magluwas diri, nagaplano man ang PACE nga magpasaka sang kaso sa Ombudsman.
