Opisyal nga ginpahayag sang administrator sang National Electrification Administration (NEA) nga pagabuslan sang retired general manager nga si Domingo Santiago si Engineer Ray Bustamante bilang officer-in-charge sang Negros Occidental Electric Cooperative nga nahamtang sa ciudad sang Kabankalan.
Kahapon, nagpadulong si Almeda sa main office sang NOCECO sa ciudad sang Kabankalan agud nga iserbe ang suspension order batok kay Bustamante bangud nga indi insakto ang proseso sa pag-appoint diri.
Sa interview sang Bombo Radyo kay NEA Administrator Antonio Mariano Almeda, gindagdagan sang 90 day suspension si Bustamante para magpasa sa NEA sang rason kun ngaa indi ini paghatagan sang penalidad.
Suno diri, si Domingo Santiago nga isa ka retired general manager ang temporaryo nga magapungko bilang OIC general manager.
Ini agud mapadayon ang operasyon kag serbisyo sang NOCECO.
Dugang pa sini nga eksperyensyado si Santiago sa pagpamalakad sa kooperatiba kag pamilyar sa posisyon.
Pahayag ni Almeda sa tion nga magbalik na ang tanan sa normal sila maga-appoint sang regular general manager kun sa diin maga-agi sa husto kag insakto nga proseso ang pag-appoint diri.
SAMTANG…Ginkabalaka ni Negros Occidental Vice Governor Jeffrey Ferrer nga maremalaso ang sweldo sang mga empleyado sang Negros Occidental Electric Cooperative (NOCECO) kasunod sa natabo kahapon kun sa diin nakita sini mismo nga nakapadlock ang opisina sang NOCECO kag wala ang mga department heads sang electric cooperative matapos nga nagpadulong didto ang National Electrification Administration (NEA) sa pagserbe sang suspension order batok sa OIC general manager nga si Engineer Ray Bustamante.
Suno kay Vice Governor Jeffrey Ferrer, makaluluoy ang mga empleyado sang NOCECO nga indi makabaton sang sweldo.
Suno diri, dapat masiguro nga maswelduhan ang mga empleyado sang NOCECO bangud sa long weekend kasunod sang Barangay and Sangguniang Kabataan Elections nga patigayunon sa Oktubre 30.
Isa pa suno diri, ang mga empleyado nga indi maswelduhan, wala na ang mga ini gana nga magtrabaho gani dako ini nga epekto sa operasyon sang kooperatiba kasubong man nga apektado ang member consumers.
Pahayag ni Ferrer, concern lamang sini ang sweldo sang empleyado sang NOCECO nga wala man sang sala.
