Padayon ang matawhay nga pagpatigayon sang Brigada Eskwela sa Mandalagan Elementary School.
Sa interview sang Bombo Radyo sa principal nga si Leo Ceralbo, nag-umpisa sila sang Biyernes sang Brigada Eskwela nga gintambongan sang mga benepisyaryo sang Tulong Panghanapbuhay sa Ating Disadvantaged (TUPAD) sang Department of Labor and Employment, mga ginikanan, kabataan kag miyembro sang Pantawid Pamilyang Pilipino Program.
Suno diri, tayuyon ang pagpaninlo sa buluthuan para sa preparasyon sa pag-abre sang klase sa masunod nga semana.
Padayon man ang multi-tasking sang mga manunudlo kag ginikanan sa pagpaninlo sa eskwelahan, kag nagpreparar man ini sa ihatag nga pamahaw para sa TUPAD kag 4P’s members.
Pahayag ni Ceralbo, mas manami lantawon nga malimpyo ang palibot sang eskwelahan nga sa pagsulod wala sang may makita nga sagbot.
Wala naman sang problema sa mga bangko sang estudyante samtang aminado man ini nga madamo sang guba nga electric fan sa kada classroom kun sa diin ang init sang tiyempo makapadula sang ila konsentrasyon sa klase.
Samtang, nag-athag man ini nga wala ini nagapangayo sang solicit apang batunon lamang sini ang ihatag nga bulig para sa eskwelahan basta ini boluntaryo nga hatag.
18 naman ka mga classrooms ang gin-renovate, kag bangod may kakulangan sang classroom gindesisyunan nga ang library ang I-convert bilang classroom.
Samtang, may yara man sang corner nga temporaryo nga ginhimo nga library nga ila ginatawag nga “Higad sang Kaalam” nga ila ginhamtangan sang mga reading materials.
Samtang, sa interview sang Bombo Radyo kay Liza Malacao, nagpadulong ini sa buluthuan alas 8:00 sang aga agud mag-Brigada Eskwela para sa kabataan sini nga pre-school, elementary kag high school.
Suno diri, bilang miyembro sang 4Ps, sila ang required nga magpartisipar sa Brigada Eskwela humalin alas-8:00 tubtob alas-10:00 sang aga.
Pahayag ni Malacao, pagpanglaba lang ang trabaho sini gani ang makuha sini nga ayuda gikan sa 4P’s ang iya gamiton para sa school supplies sang iya kabataan.
